IKASTURTE BUKAERAKO BESTA
2025-2026 ikasturteari bukaera emateko, EiTxo eta Einstiñarekin denboraren makinaz baliatuz, aurrera eta atzera ibili ginen denboran zehar. Hamarkada eta estilo ezberdinetako dantzak ikusi genituen eta primeran pasa genuen.
R.B OLINPIADAK
Hirugarren mailako ikasleak buru belarri aritu gara olinpiaden proiektuarekin. Gizakiok lau gaitasun fisiko ditugula landu dugu: INDARRA, ABIADURA, ERRESISTENTZIA ETA MALGUTASUNA.
Hiruhilabetean zehar talde bakoitzak horietako bat landu eta laugarren mailakoak proban jartzeko jokoak prestatu ditugu. Talde bakoitzari azalpenak eman ondotik, ederki pasatu dugu gure burua zeinen indartsua, azkarra, iraunkorra eta malgua den ikusten!
Bukaeran, domina bana banatu dugu, musikan sorturako ereserkia entzunez,. Zorionak denoi, harro egon gaitezke!
2. ZIKLOA ALTSASUKO IZAR ESKOLAN ETA SALTING-EAN
Ikasturtearen amaiera iritsi aurretik, ezin genuen elkarrekin irteera bat egin gabe utzi. Laugarren mailakoak hiruhilabete honetan lanean ari diren proiektuaren harira, Altsasun dagoen Izar Eskolara joan eta bertan udan ikusi ahal izanen den eklipseari buruzko hainbat gauza berri eta simulazioa egin ahal izan genuen. Ea zortea dugun udaran esperientzia erreala bizitzeko!!
Ondotik, eguna borobiltzeko Salting-era joan eta izerdi, irri eta batez ere, salto ederrak egin genituen! Ederki pasatu genuen, ikasturtearen hondarko txanparako indarberrituz!
ORION
Joan den apirilaren 28tik apirilaren 30era arte Orioko aterpetxean egon ginen bigarren zikloko ikasle eta irakasleak. Bizpahiru egun alde batetik bertzera ibili ondotik, ekintza ugari egiteko aukera izan genuen: Zarautzeraino oinez joan, kayak-etan ibili, itsasontzi txiki batzuk eraiki… baina batez ere, elkar goxatuz ederki disfrutatu genuen denek!
KORRIKA 2026
Korrika ofizialerako berotuz eta EiTxoren konpainian, gure Korrika Ttikia ospatu genuen astelehen arratsaldean. Eskolatik Matzadara abiatu eta bertan bost buelta eman genituen, lekukoa mailaz-maila pasatuz. Azkenean EiTxok gela bakoitzean idatzitako mezu sekretuak ozenki irakurri zituen. Esker anitz gerturatu zineten familiei. Primeran pasa genuen.
Astearte goizean berriz Korrika ofizialean parte hartu genuen eskolako hainbat ikasle, guraso eta langileek. Gero jantokian prestatu ziguten gosari goxoa dastatzeko aukera ere izan genuen. Esker anitz jantokiko langile eta gerturatu zineten guztioi.
