Aurtengo ortzegun-gizenean, peña eta txarangen gibeletik, Inude eta Artzaiek herriko ohiturari jarraipena eman genion. Eskolako sukaldariek prestatutako bazkari goxoari, eta modu ezberdinetan parte hartu duzuen guztioi esker, energiaz beteta aritu ginen kantuan eta dantzan. Primeran pasa genuen. Gora Inauteriak!
Pasa den ostiralean, urtarrilak 24, Iruñera joan ginen 3.zikloko ikasle eta irakasleak.
Lehenik proiektuarekin lotutarko ekintza ezberdinak egin genituen mailaka.
5.mailakoak Paris365era joan ginen, boluntarioen bidez haurtzaroan gizarte bazterkeriako egoerak prebenitzearen alde lan egiten duen irabazirik gabeko erakundea ezagutzera, eta 6.mailakoek berriz, Xaloa telebistako Berriozarreko estudioa bisitatzeko aukera izan genuen.
Jarraian, Saltingera joan ginen denok batera. Bertan bazkaldu eta pozez saltoka Berara itzuli ginen.
2024 urteari agurra emateko, Olentzero eta Mari Domingiren bisita izan genuen. Zenbait kanta abestu genizkien, beraiek opariak banatu zizkiguten eta jantokian prestatutako txistorra pintxoen konpanian, ederki pàsa genuen goiza.
Abenduaren 16, 17 eta 18an, gure eskolako lehen hezkuntzako ikasleek bide-hezkuntzako jardueretan parte hartu zuten. Ikasgelan oinezkoen, zikloturisten eta auto-bidaiarien segurtasun-arauak errepasatu ondoren, ikasleek arau horiek errespetatzea praktikan jarri zituzten Eztegara pilotalekuan muntatu zen zirkuitu batean.
Pasa den abenduaren 4ean ospatu genuen aurtengo Euskararen Eguna. Kultur Etxean hasi genuen ospakizuna eta bertan EiTxo itxura aldatua ezagutzeko aukera izan genuen. Zenbait bideo eta kanta entzun genituen eta ohiko moduan, seigarren mailako ikasleek “EiTxo, euskaraz garbi mintzo” abestia txirularekin jo zuten. Bertan 5. eta 6.mailako saskiaren eta afariaren zozketa ere egin genituen
Eskolara itzuli eta sukaldariek prestatutako hamaiketako goxoa dastatu ondoren, EiTxo berriaren sortzaile den Paula Artiedaren laguntzarekin, 4.,5. eta 6.mailako ikasleek kartulinaren gainean marraztu genituen hainbat EiTxo. HH eta LHko gazteenek berriz gelan paperaren gainean EiTxo aunitz margotzen aritu ginen. Primeran pasa genuen.