Apirilaren 30ean, seigarren mailako ikasleek, Marta Beorlegui Oses judokaren bisita jaso genuen. Modu atseginean, bere ibilbideari buruzko aurkezpena egin ondoren, inprobisatutako Tatamian, oinarrizko hainbat giltza erakutsi eta praktikan jarri genituen. Oso gustura aritu gara.
Pasa den apirilaren 23an eskolako hiru espazio berri inauguratu genituen: Liburutegia, Ikasnova gela eta Gela Multisensoriala. Berrogeita hamar pertsona inguru elkartu ginen, ikasle, guraso eta irakasle artean, Aitor (alkatea) eta Patxi (zinegotzia) ere, bertan izan genituen. Sentsazio onarekin eta irribarretsu atera ginen guztiok. Esker aunitz bertaratutako gurasoei eta antolaketan parte hartu zuten ikasleei.
Apirilaren 23an, arratsaldez, Liburuaren Eguna ospatu genuen. Ikasle zaharrenek gazteenei, ipuinak irakurtzen aritu ziren, eskolako espazio ezberdinetan. Ondoren, bakoitzak bere gelan, irakurritako liburuaren protagonistak marraztu eta gela bakoitzak mural bana egiteaz gain, larrosa bana ere margotzen aritu ginen. Oso gustura aritu ginen.
Korrika ofizialerako berotuz eta EiTxoren konpainian, gure Korrika Ttikia ospatu genuen astelehen arratsaldean. Eskolatik Matzadara abiatu eta bertan bost buelta eman genituen, lekukoa mailaz-maila pasatuz. Azkenean EiTxok gela bakoitzean idatzitako mezu sekretuak ozenki irakurri zituen. Esker anitz gerturatu zineten familiei. Primeran pasa genuen.
Astearte goizean berriz Korrika ofizialean parte hartu genuen eskolako hainbat ikasle, guraso eta langileek. Gero jantokian prestatu ziguten gosari goxoa dastatzeko aukera ere izan genuen. Esker anitz jantokiko langile eta gerturatu zineten guztioi.
Pasa den martxoaren 13an, azken urtetako ohiturarekin jarraituz, Ricardo Baroja eskolako 5. eta 6.mailako ikasle eta irakasleak, Otsandara zuhaitzak landatzera oinez joan ginen. Guztira berrogeita hamar bat gaztainondo landatu genituen.
Berako Udala gaztainondoak berreskuratzeko proiektu batean murgilduta dago Cederna Garalurrekin eta Rural Kutxarekin batera, eta proiektu horren barrenean egin genuen landaketa.
Ederki pasa genuen.